Santiago de Compostela, 19 de marzo de 2024. O Centro Sociocultural Maruxa e Coralia acolle a exposición "Economía Social no corazón da nosa historia", impulsada pola concellaría de Dereitos e Servizos Sociais, Promoción Económica e Xuventude de Santiago, xunto co Foro pola Economía Social Galega.
Esta mostra destaca o valor da economía social máis aló das cifras, centrándose nas persoas, a calidade do emprego e a sustentabilidade.
A concelleira María Rozas, o presidente do ForoEsGal, Celso Gándara, xunto con representantes das entidades de economía social como Mino Martínez, presidente de Cegasal, inauguraron a exposición, que é parte do compromiso da cidade co fomento deste modelo económico.
A mostra rende homenaxe ás pioneiras da Economía Social e evidencia o papel fundamental das máis de 4.700 organizacións de economía social en Galicia, destacando a iniciativa como un eixo clave da Axenda Urbana 2030 e a colaboración municipal para promover un desenvolvemento máis inclusivo e sustentable.